Azərbaycana neft və qazdan daxil olan valyuta 5 milyard dollardan çox azalaraq 33,6 milyard dollardan 28,5 milyard dollara düşüb.
2023-cü ilin yanvar-noyabr dövründə (11 ayda) Azərbaycandan 28 milyard 479 milyon 306 min dollar dəyərində neft-qaz sektoruna daxil olan mallar ixrac edilib
Dövlət Statistika Komitəsinin aylıq hesabatında bildirilir.
O cümlədən, cari ilin 11 ayında 15 milyard 99 milyon 942 dollarlıq xam neft, 12 milyard 775 milyon 689 min dollarlıq təbii qaz ixrac olunub.
Müqayisə üçün qeyd edək ki, 2022-ci ilin yanvar-noyabr dövründə (11 ayda) Azərbaycandan 33 milyard 647 milyon 116 min dollarlıq neft-qaz sektoruna daxil olan mallar, o cümlədən 18 milyard 318 milyon 642 min dollarlıq xam neft, 14 milyard 807 milyon 620 min dollarlıq təbii qaz ixrac edilmişdi.
Beləliklə, neft-qaz sektoruna daxil olan mallar üzrə Azərbaycana daxil olan valyuta 2023-cü ilin yanvar-noyabr dövründə ötən ilin eyni dövrü ilə müqayisədə 5 milyard 167 milyon 810 min dollar azalıb. Xam neft üzrə gəlir 3 milyard 218 milyon 700 min dollar, təbii qaz üzrə gəlir 2 milyard 31 milyon 931 min dollar azalıb. Əsas səbəb ötən illə müqayisədə neft və qaz qiymətlərinin daha aşağı olmasıdır.